米杜士堡茅塞「頓」開

米杜士堡茅塞「頓」開
 
唔通輸到傻咗？米杜士堡自從英足盃被阿仙奴淘汰後，接連踢兩場聯賽得1和1負，好在佢哋今周仍有主場之利，對家保頓近況又比佢哋更差，主勝可以做膽。（周二18，香港時間周三3:45am開賽）

米堡英足盃被阿仙奴踢出局後，接連作客僅和伯明翰同主場不敵列斯聯；好在球隊今周仍有主場之利，早前9戰6勝3和佳績肯定唔係偶然，今周主力如安歷基傑基、李爾湯連同班福特等都可候命，贏面依然好高。客軍保頓近排表現比米堡更衰，近8戰僅1勝輸5場；睇清楚佢哋戰績，可發現呢支前英超球隊後防漏水問題嚴重，近4戰有3場波係失4球，前面方祖、克勞夫等入埋都唔夠後面輸，造訪米堡都係凶多吉少。

卡迪夫城受讓有計

韋根主場對卡迪夫城亦係受注目對碰。韋根近8戰僅1勝，球隊賣走麥馬拿文後僅引入賓納，證明根本無心戀戰；相比下卡迪夫城雖然都好耐冇贏過，但近排對白禮頓同布力般都起碼攞到1分，今晚受讓有計。（周二21，香港時間周三3:45am開賽）
最後揀埋狼隊主場對富咸比賽。狼隊近周先後大勝過哈特斯菲爾德同洛達咸，阿科比同洛哈迪高等腳風都好順，主場出擊有計。富咸自炒咗馬加夫後有過一段好日子，但近排有打回原形，唔經唔覺已7場不勝，場場最多入到1球，狼隊如果發揮好啲，開埋個「讓主」都仲得。（周二22，香港時間周三3:45am開賽）