曼城和局手到拿來

曼城和局手到拿來

一樣嘅主客次序，同樣16強相遇，今年會唔會有唔同嘅賽果？周二晚歐聯迎嚟16強最強戲碼，億萬大軍曼城將會主場出戰巴塞，上季兩軍16強對陣，巴塞兩回合贏晒輕勝4:1，今年曼城陣容上變動唔大，反而巴塞剛於聯賽輸波士氣被挫，睇好曼城可於主場至少保住不敗。（周二11，有線61、64、201及203台周三3:45am直播）

曼城剛於聯賽大勝紐卡素5:0，聯賽追到同車仔只差5分，士氣有幾勁已經唔使多講，不過上年兩隊對碰，顯示出嘅級數差距唔容易消除，首先曼城防線上僅得隊長高柏尼夠級數防住「MSN」組合，中堅位置用上迪米捷利斯定文加拉都好，一樣都係轉身慢唔夠快冇速度，今場唔知會俾美斯點玩法，右路有薩巴列達守住尼馬叫好啲，但蘇亞雷斯搵邊個睇？唔好忘記蘇七征戰英超多年對曼城更熟路，呢場曼城諗住死守唔失波肯定不切實際。

高柏尼自言信心十足

既然都知一定守唔住，不如同巴塞鬥攻好過，上季曼城主客兩回合，射手阿古路因有傷在身只打咗45分鐘，曼城雖敗不辱，今次唔同晒嘅係，主隊有齊施華、阿古路在陣，隊長高柏尼更直言未驚過巴塞，只係想盡快進行呢場咁高層次嘅啦對碰，咁又係，曼城今季主場有能力反勝拜仁，自然有信心擊敗巴塞。

巴塞今季進攻太單調

不過講鬥攻，恐怕全歐洲都冇一支球隊敢對住巴塞咁做，因為單論把握力，巴塞「MSN」組合坐擁南美最強三箭頭，同巴塞鬥轟，九成多多唔夠輸，不過巴塞今季踢法其實幾單調，攻勢往往靠美斯起動右路個人突破，最後由自己起腳或引守衛來犯，再交個過頭波俾尼馬或蘇亞雷斯，所以啱啱贏咗巴塞嘅馬拉加，佢哋守門員卡文尼就同舊老闆柏歷堅尼教路，只要好好防住巴塞兩翼，巴塞火力已大減。的確，今季恩尼斯達跌Watt非常明顯，中路幾乎冇晒突破力，今場中路進攻可能要靠沙維下，曼城都唔算太難防守，如果曼城做到已大大減低失球數字，估雙方都有入球，曼城應該可以至少守住和局。