國米上盤「里」所當然

國米上盤「里」所當然
 
國際米蘭雖然唔算好叻，不過佢哋今晚嘅對手卡利亞里確實太頹，近3場意甲未嘗一勝，所以「藍黑兵團」肯定會追打追水狗，反客為主開個平手、半球上盤，為己為人都要波盤齊贏。（周一8，無綫網絡電視301頻道周二4:00am直播）
卡利亞里處於降班區域，上仗作客對拖連奴俾對手迫和1:1，連續3場聯賽未能響勝鼓，教練蘇拿雖然力讚門將貝基治表現出色，多次力挽狂瀾，但同時亦批評前鋒球員嘅把握力好差，無奈兩位正選法蘭斯高比辛奴同埋巴辛奴會繼續倦勤，卡利亞里想發力搶分都難，主場都難以睇好。
國際米蘭有安迪奧利、迪岩布斯奧、安迪奧利、長友佑都同埋莊拿芬施些路受傷，不過球隊近期戰績有所改善，上仗作客阿特蘭大以4:1大捷而回，新兵梳頓沙基利終於為球隊貢獻加盟後首個聯賽入球，而中場古亞連喺呢場比賽亦梅開二度，連續兩場意甲有「士哥」，一班主力嘅狀態同腳風都好順。國米周中歐霸盃同些路迪激戰成3:3完場，另一殺手柏拉斯奧又有兩球斬獲，攻擊力唔使懷疑，作客讓平手、半球可捧上盤。