拿玻里「大」「薩」三方

拿玻里「大」「薩」三方
 
周一晚意甲做主菜，實力份子拿玻里喺主場迎戰神經刀薩斯索羅，贏唔贏到真係好難講，唯一可以肯定嘅係，兩隊都有超強攻力，所以直接買個入球大仲實際，1.62倍熱都照捧。（周一1，無綫網絡電視301頻道周二2:00am直播）

拿玻里上場意甲爆冷不敵巴勒莫，結束聯賽4連勝走勢，不過佢哋周中歐霸又大勝土耳其特拉布宗，軒歷基阿祖安奴、希古恩、加比亞甸尼同埋杜雲沙柏達分別取得「士哥」，故此陣營內依然士氣高昂，雖然射手米捷、恩斯治尼、美斯度同埋辛尼加等傷兵未及康復，不過球隊仲有荷西卡利祖同埋約拿芬迪根斯文等好波之人列陣，攻力唔須要懷疑，加上拿玻里近3場比賽全部開出入球大，是役預計又會出現入球騷，捧場客可以放心。
薩斯索羅近況回落，上場意甲迎戰費倫天拿以1:3落敗，最近6場聯賽僅取得1場勝仗，不過佢哋嘅進攻火力就冇減弱，至今已連續12場聯賽取得入球。幾位守將包括比路素、泰拿洛華同埋柏高奴繼續因傷缺陣，但係前場主力好似杜文尼高貝拉迪、施蒙尼沙薩、尼高拿辛桑尼同埋費路卡利就冇傷冇病，好明顯又係攻強守弱格局，呢啲顛鳳鬥狂龍場合絕對勝負難料，識揀梗係揀入球大啦，睇住兩隊鬥攻吖嘛。

薩軍幾個月冇食蛋

兩隊上次冇入波要追溯到好耐之前，薩斯索羅上次食蛋係去年11月初，悶和阿特蘭大0:0，而拿玻里就係去年12月中不敵AC米蘭0:2，今晚交手追住個入球大嚟買實冇錯。