修咸頓和局「利」潤豐厚

修咸頓和局「利」潤豐厚

星期日晚大年初四又有多場好波上演，英超大戰中有修咸頓對利物浦大戰，兩隊今季目標都直指前四席位，而賽前利物浦少修咸頓4分，今場稍一不慎輸波應萬劫不復，修咸頓對上9場聯賽僅輸一場，又唔似今場會突然走樣，兩隊不相伯仲似乎幾有機會開出和局。（周日27，now621台周一12:15am直播）

今季英超前四次爭何其激烈，除車路士一支獨秀外，連第2位曼城和第7嘅利物浦都只係差10分，一場上落已經大執位，而且唔好睇紅軍好似落後太多，呢支上屆二哥今季陣容上好多變動，蘇亞雷斯離隊後重新執位，到12月左右時間班頓羅渣士終於搵到啱球隊打嘅343陣式，利物浦對上9場聯賽未嘗一敗，呢一次作客聖馬利球場絕對不落下風。

巴神爭射12碼損軍心

當然紅軍今場都多隱憂，先係周中歐霸巴神又搞事，走去同代隊長佐敦軒達臣爭射12碼，雖然射入贏波，但引起嘅問題更嚴重，因為有部分人認為巴神12碼好應由佢射，但謝拉特就公開認為唔應該破壞規矩，無端端惹爭執對軍心必有影響，而球隊今場亦續有謝拉特及盧卡斯養傷未出得，面對硬淨嘅修咸頓中場都幾蝕底。

修咸頓缺賴恩貝特蘭

不過如果計陣容，「聖人」今場都唔齊腳，先係左閘賴恩貝特蘭今場要停賽，要由吉田麻也頂住左路，而朗奴高文就話，唔會為對方有三個倒戈球員而諗太多，佢腦入面只諗緊點贏呢場波，點計呢場波雙方都各有優劣，加上心態上會好驚輸，呢場手緊下幾可能悶和收場。