曼城讓主橫「素」千軍

曼城讓主橫「素」千軍

新一年先祝大家喜氣洋洋，萬事勝意！大年初三撞正星期六，睇波避赤口最啱，當中全晚最有睇頭對碰，都應該係曼城主場對紐卡素大戰；紐卡素自有柏祖離隊後就只贏過一場，而曼城都唔係叻，缺耶耶托尼下近6戰僅1勝，不過曼城今晚已齊腳，連新兵韋菲特邦尼都可披甲，分分鐘呢場波正選落場，俾阿古路唞唞打巴塞都唔定，柏歷堅尼必希望以一場大勝振士氣。（周六50，now621台周日1:30am直播）

紐卡素1月放走柏祖，「喜鵲」球迷自然高興，但球隊未有搵個高質領隊接任，可能連球迷當初都估唔到，而呢個舉動都表明球會已經放棄今季賽事；事實上，紐卡素現時在聯賽已有32分在手，距離降班線有10分，如果冇心爭任何歐洲賽席位，現時都可以算係風流波，而球隊今季對熱刺、阿仙奴、曼聯及車路士，輸2球已經係最低消費，結合季內13場聯賽作客3勝嘅差劣成績，呢場再大敗俾曼城唔出奇。

耶耶歸隊暫解決問題

曼城1月羅致邦尼成為英超標王，但冇呢名新兵唔最重要，缺耶耶托尼至大件事，喺呢名中場大將缺陣下，曼城一直打到上一周至識贏史篤城，聯賽俾車仔拋離到7分下，嚟緊每一場聯賽都重要，實在唔需要認為佢哋會為周中惡戰巴塞留力，但耶耶托尼回歸球隊，都唔完全解決晒所有問題，因為佢已經拒絕同曼城續約，睇嚟一如傳聞咁講，好有機會到國米同文仙尼重聚，未知會唔會影響其他球員士氣。
邦尼踢法食住紐卡素

不過就算曼城唔喺最佳狀態，都相信佢哋仍然有能力喺主場大勝，首先過去4次主場曼城有3次大勝而回，今季聯賽盃出副選輸不能作準，而且邦尼過去代表史雲斯，2次對住紐卡素入3球，呢場都幾有可能被委以重任，點計主隊都有能力大勝一場。