史雲斯“紅”運當頭

史雲斯“紅”運當頭

數英超開季第一場波爆大冷，應該就係曼聯在奧脫福輸畀史雲斯，攪到雲戈爾初到英倫面目無光。今晚“雲魔頭”帶領球隊遠赴威爾斯再戰“天鵝”，要報回首循環一敗之仇，相信有一定困難。

史雲斯近況唔算太好，近六戰只得一勝，狀態肯定不及曼聯。不過，“天鵝”近三次打紅魔都特别精神，好似前世有仇一樣，今仗主場出擊，更會加多兩錢肉緊。紅魔想食天鵝肉？冇可能囉！初盤曼聯仲要讓半球，揀硬史雲斯冇得輸。史雲斯目前排聯賽第九位，都算係無憂無慮，每場都可以盡情發揮。唯一可惜走咗邦尼後，前線火力的確不足，高美斯仍需要時間磨練，但冬季加入拿夫頓與確克可以加強防守力度，只要今場踢出部署，史雲斯應可坐和望贏。

曼聯近七場比賽保持不敗兼贏足五場，球隊已經重返正軌。但球隊踢作客勝算唔高，聯賽十二場作客和足一半有多，而且只得三場勝仗，仲係作客輸盤率各隊之冠。新年流流輸輸聲，當然唔啱聽，一於捧史雲斯分“紅”。

推介：史雲斯2:1