波圖上盤一本萬「利」

波圖上盤一本萬「利」 

瑞士巴素利喺歐聯最好嘅成績係16強，今屆想衝破呢個關卡仍然困難重重，因為球隊嘅傷兵唔少，加上有主力停賽，首回合迎戰葡萄牙球隊波圖唔樂觀，受讓平手、半球都揀客軍開上盤。（周三1，有線64及203台周四3:45am直播）

巴素利由前葡萄牙國腳保羅蘇沙任教，佢曾經執教過賓菲加同埋士砵亭，對於今仗對手波圖當然瞭如指掌，好可惜巴素利喺歐聯有16強魔咒纏身，歷年嚟都唔可以突破呢一關，上屆同一階段就合計負拜仁慕尼黑1:7而出局，球員心理上有啲輸蝕。另外，巴素利有正選後衛法比安舒哈停賽，另一保加利亞國腳級中堅艾雲伊雲洛夫又受傷，科特迪瓦左閘阿當馬查奧爾亦會倦勤，換言之成條防線同瓦解咗冇分別，大戰前夕先嚟搞呢啲咁嘅嘢，巴素利真係有排頭痕。

積臣馬天尼斯大勇

波圖近4場比賽全勝，當中包括以5:0大破費利拿，同埋喺葡萄牙聯賽盃輕取科英布拉大學4:1，哥倫比亞前鋒積臣馬天尼斯持續有好表現，今屆上陣26場合共轟入21球，肯定會成為巴素利嘅心腹大患，而奧利華托利斯、巴謙美同埋哥利斯馬等攻擊球員近期亦頻頻取得「士哥」，捧場客唔使擔心波圖嘅攻擊力，球隊嘅唯一傷兵係阿祖安盧比斯，不過呢位嚟自馬體會嘅球員並非必然正選，影響相當有限，買波圖嘅朋友唔使慌張。
足智彩今仗開出讓球盤，波圖有實力有經驗，出征瑞士都有能力反客為主，加上讓平手、半球唔係多，主隊巴素利嘅防線又大執位，波圖呢個上盤真係全日信心之選。