史浩克皇馬「大」吉大利

史浩克皇馬「大」吉大利

年三十晚唔係炒鑊金咁唔俾面呀！歐聯16強首回合大戰，史浩克04主場再遇皇家馬德里，上一年同樣16強賽事，同一個對碰皇馬兩回合大炒史浩克9:2，單係首回合作客就贏6:1，照計今次輸少一半04都難逃一劫，不過以皇馬近況奇差，人腳不整加上史浩克04有迪馬堤奧執教，賽果肯定同上年大不同，呢場04肯定同皇馬放手鬥攻，勢必上演一場入球騷。（周三2，有線61及201台周四3:45am直播）

一如我哋之前所料，皇馬1月果然大幅跌Watt，原因在於12月休息唔夠，莫迪歷受傷，中場完全失去控制力，到前仗連沙治奧拉莫斯都拉親，皇馬即時喺聯賽大敗俾馬體會0:4，而咁啱呢個時間，C朗又正受情傷，已經連續5場波冇波入，皇馬呢場邊有本錢再重演上季大勝6:1一幕。

迪馬堤奧帶起史浩克

事實上，正如皇馬中路主力卻奧斯都揚言，呢場波肯定唔易打，因為04喺迪馬堤奧執教下已經唔同晒，歇冬後04四戰兩勝迫和拜仁，前鋒祖普莫亭打到着晒火，聯賽已入9粒，雖然球隊仍然有達斯拿養傷未出得，但中路新星麥斯美亞已完全勝任派牌重責，而且聯賽停賽嘅亨特拉爾喺歐聯可以落場，正如祖普莫亭都話，如果亨特拉爾同佢組成雙箭頭，絕對可以摧毀任何防線，何況皇馬今仗冇沙治奧拉莫斯，又被迫用上炸彈比比，04就更加有爆冷條件。

C朗回落皇馬踢整體戰

皇馬啱啱喺聯賽只能小勝拉科，表現絕對令人失望，而且過程上C朗連一個中龍埋門都冇，狀態處於低點，但安察洛堤應該都睇到呢一點，呢場好有可能將攻擊重心放番喺賓施馬及艾斯高身上，睇皇馬早前有C朗停賽下打得更流暢，呢一戰皇馬如果打回整體戰仍然有充足火力攻破04，兩回合賽事對於皇馬嚟講冇必要一家贏，大比數和波都非常有利晉級。