水手主場同「州」共濟

水手主場同「州」共濟
 
唔好睇見「廣州」呢兩個字就以為廣州RF就係廣州恒大，實際上佢哋就係首次打入亞冠嘅廣州富力，過往冇乜點見識過大場面難免要交吓學費嘅。（周二1，now671台周二4:30pm直播）
有別於歐洲賽事，今圈亞冠外圍賽係以一場過分勝負，而富力喺呢個關鍵時刻竟然冇咗經驗最老到嘅教頭艾歷臣，再睇埋全隊人腳就僅得後衛姜至鵬幫過國家隊踢過亞洲盃，其餘位置比較出名嘅球員就有于洋、前華倫西亞中場米高米基爾，同埋摩洛哥射手漢達拉亞，可惜以上外援稍嫌唔夠星味，好衰唔衰呢次作客仲要去到澳洲咁遠，牌面真係非常輸蝕，難免有傳高層出到成千萬人仔嚟做出線獎金啦。不過重賞之下未必會有勇夫，事關主隊中岸水手一直踢緊澳職，雖然成績唔算係好好，但係狀態一定唔會差得去邊，主勝唔係太熱絕對玩得過。

賓約哥入球大報「捷」

打後出場嘅賓約哥一定會聽過佢哋嘅大名，不過嚟自阿聯酋嘅艾查捷拉坐擁前祖雲達斯射手胡仙歷，陣中另一位射手穆巴奧特喺亞洲盃亦光芒四射，與其揀主客和似乎捧個「大」仲實際得多。（周二4，香港時間周二8:00pm開賽）
另一隊名牌艾薩德就未必會怕阿爾華達嘞，睇見佢哋嘅球員名單有齊前恒大球星穆里奇、加菲迪、比赫積，同埋李正秀，捧埋「讓客」都唔驚。（周二5，香港時間周二11:10pm開賽）