車仔平手盤「聖」券在握

車仔平手盤「聖」券在握

年廿九歐聯大戰正式再開！呢一周重頭戲自然落喺巴黎聖日耳門大戰車路士身上，本來以摩連奴一貫作風，呢場波根本冇需要爭勝，攞個作客入球和波就夠，不過難得聖日耳門天殘地缺，車仔可能勒住都夠贏，相反巴黎唔使輸都已經執身彩。（周二8，有線61、64、201及204台周三3:45am直播）

如果呢場波雙方都「夫添」嘅話，我都好肯定摩連奴肯定打防反，甚至泊大巴攞個和局就算，不過幾個原因驅使下，摩連奴都可能心雄想贏埋；首先，巴黎今季打到依家未坐過聯賽榜首之餘，近況其實都相當一般，近2場聯賽都只係和波僅取2分，上場對卡昂連傷4主力，末段打少個俾對方反客為主，唔輸埋已經好好彩，而早前贏波都係一球起兩球止，以伊巴為首嘅鋒線攻力非常有問題，如果車仔立心去守，巴黎都幾難入到波。

巴黎上戰連傷四主力

事實上，呢場波巴黎聖日耳門天殘地缺，上場傷出嘅卡比耶、盧卡斯、奧里亞同馬昆奴斯，全部傷勢唔輕今場唔打得，巴黎同冇咗半隊正選冇分別，而可能更致命嘅，係巴黎中堅大衛雷斯，其打法弱點都已在摩連奴掌握之中，可能只係三幾個反擊，車路士已勝卷在握。

車仔今時唔同往日

上一季車路士都係喺淘汰階段撞上巴黎聖日耳門，結果車仔喺首回合落後1:3下，返主場反勝2:0驚險晉級，有過一次經驗，摩連奴已經識對付呢支億萬大軍，而同上季最唔同嘅係，今季車路士陣容實力已提升一個層次，上季歐聯唔打得嘅尼曼查馬迪，前線迪亞高哥斯達及法比加斯，後防有活力十足嘅蘇馬，比起加咗個炸彈大衛雷斯嘅聖日耳門高點止一班波。
而更着數嘅係，對上三場波迪亞高哥斯達停賽，呢一戰復出肯定猛虎出柙，而法比仔上場都只係打20分鐘左右，成班兵以十足狀態作客法國，呢場點都坐和望贏。