普雷斯頓讓主「曼」歲

普雷斯頓讓主「曼」歲

曼聯今季由雲高爾接手之後，一直都未搵到最佳陣容，近期打般尼等弱隊，有數據計到佢哋作出超過90次長傳，原來莫耶斯九九八十一斬都未係武林絕學，上場贏般尼3:1，雲高爾話球隊咁嘅表現，可能贏唔到今仗對手普雷斯頓，係真係打得唔好，定係為咗今場開個和波搵下台階，大家要好好諗吓。

事實上，基於曼聯今季季票條款，如果曼聯喺盃賽重賽，而又喺先作客後主場嘅話，季票持有人必須以一個優惠價買飛入場，擺到明想搵多場錢，而以上一次劍橋聯為例，作客奧脫福就剩袋170萬獎金及門票收入，換作今次英甲嘅普雷斯頓，一樣對呢筆鉅款有興趣，合作啲一齊開個和波好正常。

紅魔前線鋒力疲弱

就算撇開呢啲陰謀論，就兩隊近期水準，呢場都幾有可能和波，首先曼聯近期火力其實麻麻，前鋒唔識入波，上場靠史摩寧頭槌入兩粒，第3球就係12碼，雲高爾自己都講，雖然現時曼聯最好前鋒係朗尼，但仍然需要佢做中場做策劃，今場好有可能都係費蘭尼打前鋒，而英甲隊多數有一定防空力，肯定唔怕你屈頭槌，何況講制空，普雷斯頓都有前保頓大隻佬奇雲戴維斯，呢場可能互有入球下和波，下場重賽先捧曼聯場。