李斯特城平盤做「東」

李斯特城平盤做「東」

星期日英足盃頭場主角係阿士東維拉同李斯特城。維拉愈踢愈沉，結果領隊林拔亦要被踢走，要由一隊教練史葛馬素暫代領隊職務，慘成無帥之師下難怪主場出擊都係開平手盤，一於博2.05倍客勝。（周日5，now621及633台周日8:30pm直播）

維拉可以晉級到第5圈比賽，主要原因都係佢哋對上兩圈抽到好籤，對手只係黑池同埋般尼茅夫，但球隊喺英超遇番同級對手就立即現形，聯賽5連敗之下領隊林拔結果亦被炒，依家要由一隊教練史葛馬素暫代領隊之位，同一支無帥之師冇乜分別。事實上，維拉三線雖有賓迪基、戴爾夫同華亞爾等支撐大局，但前者今季冇晒過往銳氣，戴爾夫只係工兵，華亞爾就年華老去，所以維拉今季搞成咁，根本就有跡可尋。

相比之下，李斯特城雖然都要全力護級，但佢哋明顯比死氣沉沉嘅維拉好得多，喺1月搵來賀夫同卡拉馬歷等有級數球員救亡，計活力同心態贏晒；再講，李城上圈係作客淘汰熱刺，計賽績都比主隊硬淨，加埋1月時雙方對碰，當時李城以1:0勝出，證明踢法上唔驚對手，平手盤捧佢哋贏波贏盤合理。

巴拉福特再創奇跡

另一場巴拉福特會對新特蘭。前者上圈淘汰車仔，剛戰英甲又贏米爾頓凱恩斯，配合主場之利受讓抵玩。至於新特蘭護級形勢惡劣，剛戰竟然主場都輸得比昆士柏流浪，邊可能讓得起平半？（周日18，香港時間周日10:30pm開賽）