阿仙奴細「米」已成炊

阿仙奴細「米」已成炊

好記得摩連奴曾經講過，話英冠排頭幾名球隊，同英超中下游已冇咩分別，咁英冠一哥米杜士堡，又點到阿仙奴唔驚先！英格蘭足總盃16強大戰，衛冕嘅兵工廠喺主場出擊，普遍都認為佢哋贏硬，不過米堡已經十場不敗，上圈更擊敗曼城，肯定有信心再晉一級，呢場主隊好可能久攻不下，睇嚟入球唔會太多。（周日22，now621台周一12:00am直播）

米杜士堡呢排個勢都真係一時無兩，六連勝之中，上一圈作客擊敗曼城認真誇張，而有睇過場波都知，嗰一仗係米堡守足全場，最終憑兩次反擊奠勝，可以想像佢咃今次作客酋長球場都係以穩為先，大不了和波返主場重賽都冇壞。

卡蘭卡教波有料到

而事實係，米堡領隊前皇馬球員嘅卡蘭卡真係帶得好，隊波有西班牙風格控球在腳，快攻亦有皇馬影子，而且佢哋陣容真係見得人，前鋒有比利時國腳禾臣、中路艾度馬等都係好波之人，而上回合一手一腳搞掂曼城嘅安歷基傑基頂上功夫唔差，阿仙奴如果掉以輕心輸埋都似。

阿仙奴未必排強陣

當然講近況阿仙奴都唔差，尤其奧斯爾復出後仲穩定咗，而且賽績上佢哋一樣贏過曼城，都係咁高咁大啫！不過今場兵工廠危機在於雲格可能過份托大，首先雲格已暗示，加盟後未見過影嘅基比爾包列斯達應該會落場，等有輕傷嘅哥斯尼唞唞，而前線阿歷士山齊士有傷，二月尾就有歐聯賽事打，雲格肯定唔會博，加埋藍斯韋舒亞又未出得，呢場玩吓手連新仔比歷都會喺名單之上，要攻破米堡嘅話，又要靠銀河唯一基奧特同韋碧克，阿迷聽到都心寒，所以估阿仙奴有主場之利都最多小勝，呢場入球數都係1球起2球止。