蜜蜂兵團「恩」欣向榮

蜜蜂兵團「恩」欣向榮
 
稍見復甦嘅多蒙特今晚回歸主場迎戰緬恩斯，睇嚟又係時候全取3分，畢竟蜜蜂兵團質素並唔差，之前只係欠缺咗啲信心，既然上輪德甲贏得咁漂亮，咁就唔好俾佢停，再開個「讓主」啦！（周五21，有線61及201台周六3:30am直播）

多蒙特做咗大半季呃錢黨，歇完冬都未良心發現，直至早前喺主場負奧格斯堡0:1先知搞出個大頭佛，事關當時全場球迷都唔放過佢哋，完場後留守座位繼續柴台，要勞煩兩位老大哥維丹費拿同埋曉姆斯勸喻先肯離開，呢啲咪叫做唔見棺材唔流眼淚囉。冇錯，場場咁打假波係呃埋呃埋唔少錢，但都唔好咁過份，玩到排包尾，成件事如果俾人告到上廉署，你都有排解畫啦，全隊十幾二十個人夾埋一齊累積超過半年失準，唔好當人低能啦。
關於多蒙特集體失準長達半年咁「玄」嘅話題，我哋亦無謂再作討論喇，最重要係蜜蜂兵團上場德甲已經反彈，以3:0大炒弗賴堡，當你見到奧巴美揚交出一個助攻同埋兩個入波，連馬高列奧斯都有份建功，賽後更續約兼發表效忠宣言，咁就代表咗陣營內士氣冇問題啦！

緬恩斯數名主力缺陣

緬恩斯嘅走勢就啱啱相反，佢哋歇冬後首輪即大破柏達邦5:0，但繼而就賽和漢諾威同埋負哈化柏林，所以喺德甲嘅排名亦每況愈下，最重要係陣中幾位主力包括約拿斯荷夫曼、森柏利奧、摩列斯同埋羅斯巴治都因傷肯定缺陣，人腳唔齊都幾難搶分，所以足智彩開讓球主客和，多蒙特喺主場讓一球絕對可以信賴，「讓主」共「緬」之。