車仔讓和「愛」不釋手

車仔讓和「愛」不釋手 

英超周中快車繼續開打，呢一晚重頭戲落喺兩支藍衣戰士身上，車路士剛險勝維拉，撞正曼城失分已喺榜首拉開7分優勢，不過愛華頓話晒係一支有實力球隊，首循環雖然大敗3:6，但過程上大部分時間都有力同車仔拉鋸，呢場車仔仍然有迪亞高哥斯達停賽，攻力點都打7折，睇嚟車路士都係最多小勝1球。（周三5，now621台周四3:45am直播）
 
唔好睇愛華頓首循環主場大敗3:6，今場作客只會輸更多，因為嗰場大敗係季初賽事，當時車路士氣勢之盛，放隊拜仁落嚟都未必夠打，而且有睇場波嘅朋友都應該記得，場波係你一球我一球咁入，去到後愛華頓稍洩氣先大敗，所以唔好以一場賽果判斷雙方實力差距。

愛華頓近況有好轉

事實上，今季表現失色嘅愛華頓，近期情況已有好轉，對上6戰未輸過1場，而幾日前嘅馬西塞特打吡，愛華頓同利物浦似乎都有啲為周中賽事保留只打成0:0，主力如巴克利都只係落場10分鐘左右，而盧卡古、米拉拿斯等進攻主力亦冇傷冇病，唯巴尼斯未知可否及時復出，但球隊肯定有能力喺車仔身上取得入球。

法比加斯強勢復出

車路士上場險勝，摩連奴都大讚球員鬥志佳，而的確呢場勝仗都幾重要，因為今季用人唔多嘅車仔，對上5場僅得1勝，而且1月轉會窗只買入一個古達度，車仔下半季夠唔夠兵力係一個好大問題；而且喺呢個時間，竟然傳出一對來自馬體會嘅球員，菲臘比路爾斯及迪亞高哥斯達，話喺車路士生活不如喺馬德里，又要睇吓摩連奴點拆招；不過可幸嘅係，車路士今場有大將法比加斯復出，中場創造力提升幾個級別，前線雖然仍有迪亞高哥斯達停賽，但杜奧巴仍然有心有力，呢場贏得多唔敢講，但車仔主場點都有威力，應該可以小勝而回。