曼城客勝「篤」定收錢

曼城客勝「篤」定收錢 
 
英超衛冕冠軍曼城過去周末又失分，球隊日前更傳出要換帥，喺馬體會搵施蒙尼頂替柏歷堅尼帥位，「工程師」為保飯碗今晚肯定出盡十二成功力替球隊攞盡3分，唯一係作客讓半、一太辣，都係要1.56倍客勝穩穩陣陣用嚟過吓關比較穩陣。（周三8，now622台周四3:45am直播）
曼城上周末主場僅迫和侯城1:1，依家已落後車路士7分，之後再不容有失。由於失分頻頻，今季仲好有機會四大皆空，英國傳媒都吹晒風，話曼城高層已經唔耐煩，準備喺馬體會搵施蒙尼過檔，現任領隊柏歷堅尼聽到呢單消息，今晚肯定出盡十二成功力做部署啦，如果唔係真係飯碗不保架。至於人腳方面，曼城近排已有拿斯尼復出，前面亦有齊阿古路、迪斯高同祖維迪供選擇，如果臨場見到耶耶托尼同韋菲特邦尼有份喺後備席候命，贏波信心就肯定更大。

史篤城欠缺創造力

主隊史篤城上場作客迫和紐卡素，但睇完場波，發現冇咗保贊之下佢哋真係冇晒創造力，僅靠高治高空轟炸，藍月亮防線相信幾易作防範，所以今晚大家信唔過半一盤，單捧客勝真係幾肯定有錢收。