加納上盤道高一「赤」   非洲國家盃東道主赤道畿內亞喺4強迎戰加納，睇嚟都係時候行人止步喇，畢竟加納大賽經驗豐富，陣中又多球星，夠晒條件晉級入決賽，足智彩開讓球盤，加納讓半球、一球上盤道高一「赤」。（周四2，香港時間周五3:00am開賽） 赤道畿內亞喺8強要踢到加時先至淘汰突尼西亞，氣力消耗甚巨，而陣中最出名嘅已經係華倫西亞B隊前鋒伊賓、米杜士堡中場尼素爾，同埋馬略卡B隊中場傑基，星味略嫌不足。雖然佢哋有標準流浪中場艾雲坐鎮，令香港球迷多咗啲親切感，不過未夠班始終係事實。 加納喺8強以3:0輕取畿內亞，陣中嘅愛華頓中場基斯甸艾素梅開二度，狀態甚佳，隊長基恩更加係身經百戰，加上有馬賽中場阿休同埋伊維恩後衛莊拿芬文沙等星級球員，今仗讓半球、一球冇難度啦！