車路士讓主「曼」勿錯過

車路士讓主「曼」勿錯過

英超今晚上演榜首大戰，車路士喺主場火併曼城，有權贏波拉開分數上嘅差距，事關佢哋近4次喺史丹福橋對藍月亮獲3勝1和不敗，加上人腳秤先，所以足智彩開讓球主客和，車仔「讓主」可捧！（周六47，now621台周日1:30am直播）

車路士早前雖然喺足總盃意外不敵巴拉福特出局，但係聯賽盃就淘汰利物浦而晉身決賽，儘管同紅軍激戰120分鐘，相信都唔會影響太大，因為領隊摩連奴表示，球員正享受聯賽盃過關嘅喜悅，形容當中嘅幸福感覺可以掩蓋疲累。中場約翰米基爾有傷，舒賀爾尼準備轉投禾夫斯堡，但係佢兩個唔係正選，球迷唔使擔心，其餘主力好似夏薩特、奧斯卡杜斯山度士、尼曼查馬迪同泰拔高圖爾斯亦健健康康，領隊摩連奴可排強陣出擊。

曼城三場比賽不勝

曼城近況麻麻，上輪英超被阿仙奴技術性擊倒，跟住喺足總盃亦爆冷不敵英冠米杜士堡，連埋較早前賽和愛華頓，球隊已經連續3場正式比賽不勝，而且中堅文加拉同埋創造型中場拿斯尼因傷缺陣，領隊柏歷堅尼又少咗選擇，須知道耶耶托尼去咗踢非洲國家盃，藍月亮頓失發電機，而阿古路復出後明顯未達最佳狀態，最弊嘅係迪斯高同祖維迪難擔大旗，新援韋菲特邦尼同樣去咗踢非國盃，咁貴買返嚟得物無所用。

林柏特倒戈難作惡

摩連奴賽前叫史丹福橋嘅球迷善待林柏特，呢位老將首循環倒戈車仔入波，幫曼城喺主場迫和舊東家1:1，今次雙方又再交手，林柏特重返呢個熟悉嘅球場，肯定百般滋味在心頭，可惜藍月亮無論係陣容定係狀態都難及車路士，林柏特想作反真係唔容易。坦白講，車仔今仗贏面好高，落注時可以再狠啲，「讓主」正合心意。