巴黎讓主「雷」霆萬鈞

巴黎讓主「雷」霆萬鈞
 
巴黎聖日耳門又獲安排喺星期五晚登場，佢哋呢日主場迎戰雷恩，以客軍近況計真係有力輕鬆贏波贏盤而回，「讓主」熱熱哋但係勝在穩陣。（周五17，無綫網絡電視302頻道周六3:30am直播）

講起巴黎聖日耳門，冇得唔提起佢哋歇冬後首場聯賽作客2:4輸俾巴斯蒂亞，喺嗰場波之後，教頭白蘭斯真係嬲到震，連大衛雷斯出席金球獎頒獎禮都唔俾，要求一班球員齊齊加操；而初步睇落巴黎班大帝對白蘭斯尚算尊重，因為之後即唔敢玩嘢，連贏4場包括雙殺聖伊天、以及擊敗伊維恩及波爾多，質、態都唔需要懷疑。至於陣容方面，伊巴謙莫域、馬高華拉堤同大衛雷斯等三線主力都可以候命，巴黎將可以最強人馬出戰，自然更有利贏波贏盤益吓街坊。

雷恩聯賽六戰不勝

打稿時雷恩聯賽排第10，睇落唔算太差，但實情佢哋啲分數都係季初搶落，球隊唔經唔覺已經6場聯賽不勝，當中只入3球，而上仗主場以1:4輸俾卡昂，更證明呢隊波連後面都唔穩陣，真係唔知用乜嘢方法，先可以喺今場波偷雞全身而退，「讓主」放心捧場。