禾堡讓主宅心「仁」厚

禾堡讓主宅心「仁」厚

經過6星期休息，德甲終於都重開，咁好正常星期五晚都有早波打，但估唔到會安排場榜首大戰喺呢晚上演啫，拜仁喺歇冬期一個人都冇買，反而借走咗梳頓沙基利，教頭哥迪奧拿真係信心十足；而禾堡冬天有慘痛噩耗，佢哋個年輕小將馬蘭達撞車身亡，今戰喺主場肯定有悼念儀式，而禾堡球員都會出盡十二分力望為馬蘭達打場好波，主隊絕對有能力保持不敗攞番1分。（周五16，有線61及201台周六3:30am直播）

哥迪奧拿上季取得雙冠都只係僅僅合格，不過佢合約就大約只餘下2年左右，有傳會方都滿意佢表現想同佢續約，當中三巨頭路明尼加更大讚哥迪奧拿表現，而路明尼加就話，哥迪奧拿好難搵到一間比拜仁更好嘅球會，希望哥迪奧拿留效10年咁話。

哥帥對強隊踢法穩陣

其實哥迪奧拿上任拜仁教頭後壓力都唔細，上季成績平平，今季聯賽拋離11分，但如果攞唔到歐聯冠軍都似乎達唔到球會期望，所以佢帶拜仁個方式其實都幾保守，今季咁多場波，對弱隊固然有霸氣，但作客慕遜、04都只係和波，當中對慕遜一場就擺明猜完場博1分，似乎今戰對住二哥禾堡，都一樣會打得較穩陣。
事實上，禾夫斯堡都的確會拚死一戰，因為今場係小將馬蘭達過身後第一場波，球隊都希望以勝利一慰佢在天之靈，而禾堡今季聯賽主場9戰不敗，更有足夠信心同條件同拜仁周旋，呢場波絕對有能力喺拜仁身上搶分。

傳禾堡引入舒賀爾尼

陣容上，拜仁今戰仍有拿姆同艾簡達拿兩大傷員，反為禾堡陣容完整，更有傳禾堡望日內將舒賀爾尼收歸旗下，心態上都唔甘於成世屈居拜仁之下，而更要知道，兩間球會之間有共同股東存在，令呢場波更充滿變數，禾堡主場不敗唔出奇。