拜仁割“禾”唔多

拜仁割“禾”唔多

德甲休戰個多月後，明晨又再重燃戰火，隨即上演榜首大戰，禾夫斯堡對拜仁慕尼黑。話就話係榜首之戰，實際上拜仁在德甲已經係一個人的武林，拋離第二位嘅禾夫斯堡有十一分差距，衛冕聯賽冠軍只係時間問題。禾夫斯堡當然希望“保二追一”，但落後實在太多。

講班底，禾夫斯堡明顯未去到拜仁級數，近十次對賽亦輸足十場，若要挑戰班霸爭一日長短，的確有排都未係時候。不過，既然要對陣，都要全力拼搏，踢出體育精神，尤其在自己地頭出戰，自然要踢出加一波。正所謂“輸人唔輸陣”，唔夠打都要打住一半先，就算嚇唔到鬼都要嚇“仁”。

拜仁在德甲的確超晒班，基本上聯賽任何一支對手都未放在眼內，最緊要係睇每場波嘅比賽心態。今場對住第二嘅禾夫斯堡，應該會加多兩錢肉緊，因為首循環對賽，拜仁只係僅贏二比一，雖然都算贏得輕鬆，但今場踢作客，始終對手有一定抗衡力，話晒禾夫斯堡今季聯賽主場仲係不敗身。初盤拜仁要讓一球／球半，要贏兩球先有純利，隨時贏波輸盤。

推介：拜仁慕尼黑  二比一