巴塞上盤大方得「體」

巴塞上盤大方得「體」

西班牙盃8強次回合，落後0:1嘅馬德里體育會返回主場出擊，但都唔代表可以收復失地，因為佢哋嘅對手巴塞隆拿近況勇銳，6連勝走勢絕非僥倖，難怪作客都讓平手、半球，上盤梗係去「馬」。（周三9，now632台周四4:00am直播）

馬德里體育會上周西甲以3:1輕取華歷簡奴，不過其中一球係對手擺烏龍，另外基沙文獨取兩球，由此可見呢位法國國腳繼續以一己之力支撐全隊，咁就未必係好事喇，兩位前鋒費蘭度托利斯同埋文迪蘇傑無論邊一個打正選，表現都唔算銳利，往往要靠一班中後場球員好似魯爾加西亞、佐治高基，甚至中堅高甸同埋荷西基文尼斯入波，依家基沙文樹大招風，若然被看管得貼貼服服，到時馬體會勢必全隊死火，所以單天保至尊並非好事，大家投注前要諗清楚。

巴塞今季雙殺馬體會

巴塞隆拿喺1月初不敵皇家蘇斯達之後，一時傳嚟安歷基帥位不保，一時又傳嚟美斯轉投車路士，但係佢哋一於話之你，抖擻精神之下又取得6連勝，當中更不乏大勝場口，包括西班牙盃同西甲加埋3度大炒艾爾切，另外贈拉科魯尼亞4蛋，西班牙盃首回合贏馬體會1:0之後，喺聯賽又以3:1斬殺呢個對手，所以今晚係兩軍短期內第3次過招，馬體會真係輸到怕，心理上好輸蝕。

南美鐵三角悉數落場

鑑於首回合贏得唔算多，所以巴塞教練安歷基一定唔會出新仔玩嘢，預期美斯、尼馬同埋蘇亞雷斯呢個南美攻擊鐵三角組合會悉數正選落場，碧基同埋馬斯真蘭奴等中後場主力亦會亮相，唯一變動只係德國門將達史特根慣常喺盃賽取代哥迪奧巴禾把關，但係影響唔算好大，所以巴塞作客讓平手、半球係有道理，上盤放心去「馬」。