華倫讓和「爾」成定局

華倫讓和「爾」成定局 

西甲今日有場超級大戰，咁當然唔係皇馬打巴塞，而係兩支爭前4嘅華倫鬥西維爾；華倫賽前僅落西維爾1分排第5，呢場波贏咗唔止可以爬頭，對賽成績更可壓住西維爾，對最後直路爭前前4時非常有利，西維爾喺星期四先打完西班牙盃，雖然冇用晒正選，但部分球員體力肯定未恢復，呢場作客可能小敗。（周日33，now632台周一4:00am直播）

西維爾今季都真係幾勁，事關佢哋喺第一循環係打少一場，如果補賽佢哋贏到皇馬嘅話，現時分數上甚至可以過埋馬體會。睇番佢哋近期表現，周中西班牙盃一戰明顯有保留，當中迪路菲奧、卡路士巴卡、班尼加都未有上陣，可以講進攻上應該未有影響，不過防線佢哋人手有限，好似丹尼爾卡列高周四都有落場，打到尾段頂唔順華倫班後生仔都唔出奇。
西維爾今季打得好，教練艾馬利好大功勞，而呢場波都幾得意，因為雙方都好多職球員倒戈，其中艾馬利以往就成名於華倫，而班尼加早年亦係華倫主力，而蝙蝠兵團就有尼格度倒戈，呢場都有啲閉門一家親感覺。

華倫小將開始成熟

雖然雙方都好熟路，但呢場都冇人情講，尤其華倫打咗半季之後，班後生仔愈嚟愈穩定，前中後三線主力，包括柏高艾卡沙、安祖高美斯、梅斯達菲及荷西加耶等，全部都仲有資格打U21歐國盃，呢班波幾咁有活力唔使多講，而喺今季季初已打到識飛嘅荷西加耶，由左閘打到變左翼，對皇馬一戰爆到卡華積面目無光，成個再版維辛迪咁款，果然立即引嚟豪門注意，阿仙奴率先出買斷價2,000萬歐羅，好彩加耶講明唔想走，而華倫都好醒立即開新約加大個買斷價，整定阿仙奴險簽系列又增一員。
首循環華倫作客迫和西維爾，呢場贏波就可確立對賽優勢，而且佢哋冇西班牙盃困身，就更可安心全力一戰，西維爾今季作客麻麻，輸都好正常。