布城下盤老少「咸」宜

布城下盤老少「咸」宜 
 
英足盃今晚頭場直播英甲布里斯托城對英超韋斯咸。布城係英甲二哥，實力同英冠大部份球隊相若，今主場迎戰韋斯咸受讓半一有計，要下盤。（周日10，now621及633台周日10:00pm直播）

噚日易搏贏喺曼城對米堡場分析都講過，依家啲英冠球隊，實力同英超中下游隊伍其實距離唔大，布城作為英甲二哥兼來季升班熱門份子，換名話講亦有英冠實力；再講，布城近況根本冇乜好挑剔，近7場正式比賽得6勝1和，近3戰對住諾士郡、唐卡士打同斯肯索普，更場場最少贏兩粒兼可以保持清白之身，主場出擊絕對有得砌。
韋斯咸以英超隊身份作客英甲隊，要讓波好合理，但要注意佢哋近排狀態有啲下滑，近7場波僅上戰3:0贏到侯城，勝出率總結而言太低；此外，客隊有首席前鋒迪亞法沙高要養傷，安祖卡路爾又一向唔係高產射手，作客要贏布城冇咁易。
另一場維拉會對般尼茅夫。維拉聯賽護級水深火熱，近排勝出率亦低到無倫，相反般尼茅夫係英冠一哥，客場近10戰僅一敗，受讓平半抵玩。（周日16，香港時間周日11:00pm開賽）