紅軍讓主信心「保」證

紅軍讓主信心「保」證
 
英格蘭足總盃第4圈賽事，利物浦狹9場不敗走勢出擊，喺主場迎戰位列英冠中下游嘅保頓，唔使講都知贏面好大，足智彩開開讓球主客和，利物浦讓一球得1.7倍，「讓主」擺明有信心啦！（周六38，now621及633台周日1:30am直播）

利物浦周中喺聯賽盃4強首回合賽和車路士1:1，史達寧又有精彩演出，加上拉爾拉拿、佐敦軒達臣同埋下季離隊嘅謝拉特都有態，今晚喺晏菲路出擊實在令人憧憬，最重要係紅軍已經累積9場不敗，氣勢絕對唔講得笑，呢排邊隊撞着佢哋只可以嘆句唔好彩。
保頓喺英冠只係排喺第15位，雖然近3場比賽取得2勝1和的不敗佳績，不過薄弱嘅陣容始終係球隊嘅致命傷，要用到前利物浦球員希斯基打前鋒就更加係笑死人，呢位老將雖然喺英冠開咗齋，但係狀態同體力都無復當年勇，踢澳職都唔突出，試問仲可以有咩作為？所以利物浦今晚食硬保頓，「讓主」唔怕捧場。

熱刺主場讓半一濕碎

熱刺對李斯特城一戰就係英超內訌，前者已經取得3連勝，似乎知道爭聯賽無望，疊埋心水向盃賽進發，相反地李斯特城喺英超暫列榜尾，為咗護級得閒死都唔得閒病，仲點會有閒情去爭足總盃吖，加上熱刺近3次喺白鹿徑對李斯特城獲2勝1和不敗佳績，上盤讓半球、一球濕濕碎啦！（周六16，香港時間周六11:00pm開賽）（利添勝）

科特迪瓦讓和去「馬」
有留意吓非洲國家盃都知道科特迪瓦成班大帝個個行行企企，其中謝雲奴喺上仗領紅，簡直同自己申請提早離隊冇乜分別，好在同樣身處喺D組嘅喀麥隆亦都失分，令到每隊波都有1分喺手，今晚對住馬里先至發力都未為晚也，只係驚韋費特邦尼、耶耶托尼等人未必拼盡，少勝馬里勉強算係合理賽果。（周六34，香港時間周日12:00am開賽）
同組嘅喀麥隆上輪同馬里踢成平手之後，由於下場就硬撼科特迪瓦，令到佢哋冇乜失分空間，可惜前線嘅祖普莫亭同埋阿布巴卡冇前輩伊度奧咁有級數，想入到畿內亞幾球真係要考吓功夫。（周六42，香港時間周日3:00am開賽）