曼城讓和「米」已成炊

曼城讓和「米」已成炊

英格蘭足總盃嚟到第4圈賽事，幾乎全數英超強隊都闖入第4圈，當中兩支曼市球隊應該對呢隻盃最有決心，尤其曼城呢支億萬大軍，點能夠四大皆空，喺聯賽冇把握過車仔下，足總盃都肯定全力出擊，不過人腳唔齊下，主場撲擊米杜士堡可能只會小勝而回。（周六12，now621台周六11:00pm直播）

呢場都可以算係兩個唔同級別聯賽二哥之爭，因為曼城係英超二哥之餘，米堡都係英冠二哥，照計數雙方差距又未算太多，就連摩連奴都講過，英冠前列球隊實力已經同英超下游球隊冇咩分別。

卡蘭卡搵摩連奴教路

事實米堡今場的確冇諗住放軟手腳，佢哋個領隊卡蘭卡係前皇馬球員，西班牙式打法佢熟晒，對住柏歷堅尼肯定冇蝕底，而且佢自己係摩連奴Fans，永遠都係防守優先，難怪今季喺英冠只失18球全聯賽最少；賽前更有消息指，佢已經搵咗摩佬教路，睇吓點樣對付曼城，呢場藍月亮本身又唔太齊腳下，要大勝米堡相信唔係咁容易。

曼城中場缺兩員大將

曼城上星期主場不敵阿仙奴，聯賽落後到5分，但賠了夫人又折兵，周中佢哋打友賽又整傷林柏特，雖然柏歷堅尼話林伯傷勢無礙，但好可能都要等到下周對車仔至出得，而耶耶托尼仍打緊非國盃，中場缺兩員大將肯定有影響，再講佢哋前線阿古路未回復十足狀態，球隊火力可能只得全盛時5成；另賽前不利消息，更指占士米拿可能同文仙尼重聚加盟國米，馬高列奧斯轉會又遲遲傾唔掂，曼城呢一輪都有啲事事不順感覺，呢場如果唔係曼城有主場之利，可能連唯一優勢都冇埋，主隊可能僅贏1粒都未定。