日本上盤剛「酋」並濟

日本上盤剛「酋」並濟

亞洲盃去到8強階段，其中奪標大熱門日本會對戰阿聯酋。日本喺分組賽三戰全勝仲要一球不失，明顯以級數計喺亞洲已難有敵手，相比下阿聯酋上場對伊朗完全唔夠打，出到線對佢哋嚟講已係超額完成，日本讓一球值博。（周五2，now671台周五5:30pm直播）

日本喺分組賽對手係巴勒斯坦、伊拉克同約旦，如預期估計佢哋要晉級當然唔難，但踢落之後球隊表現比想像中更好，分組先後入咗7球而1球不失，要知道伊拉克一向難打，而約旦之前亦有贏日本紀錄，種種跡象都證明日本有能力成為今屆奪標大熱。陣容方面，日本亦可話幾好彩，到依家都冇傷冇病冇人坐波監，中場雙核本田圭佑、香川真司以及中鋒岡崎慎司等主力都可以落場，讓球盤讓一球，要贏波贏盤唔難。
阿聯酋分組賽對手係卡塔爾、巴林同伊朗，講真出線難度比日本更低，而佢哋亦順利贏咗卡塔爾同巴林攞到出線權；問題係，球隊最後一場鬥伊朗完全唔夠打，雖然話就話球隊冇出晒正選，但伊朗又何嘗唔係有留力；再講，阿聯酋過去六次同日本對碰輸咗四次，明顯足球水準有距離，球隊呢日仲有左閘華列阿巴斯要坐波監，後防更不穩下邊阻到日本晉級？

伊朗有力贏波贏盤

另一場8強戰由伊朗對伊拉克。伊朗上場波因為已出線，教頭基羅斯根本收起晒所有主力，眾球員體力充足下，對住D組僅次名晉級嘅伊拉克絕對有力贏波贏盤。（周五1，now671台周五2:30pm直播）