撐鴨巴甸上盤必「聖」   蘇超二哥鴨巴甸會喺今晚登場造訪聖莊士東。鴨巴甸做得聯賽二哥，表現梗係唔差得去邊，冇錯佢哋上周僅3:3打和登地，但之前7戰全勝冇失波賽績冇花冇假，上場賽績可以當係偶而失準。今晚陣容上攻擊鐵三角阿當朗尼、葛維尼以及普列特都可以候命，難怪作客都會成為熱門，讓球讓半、一都可照要上盤。（周五18，亞視本地台周六3:45am直播） 聖莊士東聯賽排第6位，但咪以為佢同鴨巴甸唔係差好遠，實情球隊踏入2015年表現急速下滑，當中只贏過巴特里但輸俾咸美頓、恩華尼斯以及今戰對手鴨巴甸；睇佢哋上循環造訪鴨軍毫無還手之力，今晚就算有主場之利依舊信唔過。