澳洲上盤一箭「中」鵠

澳洲上盤一箭「中」鵠
 
唔係唔想愛國，不過中國今次8強撞正東道主澳洲，真係凶多吉少，事關主隊已展示出強勁火力，而且明顯準備充足，喺球迷吶喊助威嘅情況之下，讓球盤讓一球坐走望贏，捧澳洲上盤揭「中」。（周四2，now671台周四6:30pm直播）
有主場之利嘅澳洲，23人嘅大軍名單有16人曾經踢過2014世界盃，當中包括大名鼎鼎嘅卡希爾、般斯、米利根同埋安東尼斯等，實力完整之餘，默契方面亦有保證，雖然分組賽最後一輪不敵南韓，但係前兩輪就分別大勝科威特同埋阿曼，兩場波都分別有4球進帳，火力相當驚人，而最後失落小組首名都唔算係壞事，因為首名要硬撼風格較為歐陸化嘅烏茲別克，隨時難踢過中國，實在好懷疑袋鼠國根本係專登走線。
中國隊突破分組賽出線後，又再令國內傳媒興奮到不斷褒獎，不過呢個正正係大忌，最怕佢哋冇自知之明同澳洲鬥攻，屆時輸鑊甘都唔出奇。好少死錯人嘅馬會有讓球主客和同埋讓球盤提供，東道主點都要讓一球，莊家明顯好有信心，不妨穩陣啲買澳洲讓球盤讓一球上盤，坐走望贏冇難度。