南韓上盤「克」不容緩

南韓上盤「克」不容緩
 
亞洲盃8強大戰連場，穩如泰山嘅南韓喺墨爾本惡鬥烏茲別克，無疑可睇高一線，事關太極虎連續3場分組賽都以1:0贏波，穩穩陣陣兼保持零失球，少讓平手、半球絕對可以開上盤做低烏茲別克。（周四1，now671台周四3:30pm直播）
南韓為咗捧走今屆嘅亞洲盃，徵召咗多位喺歐洲搵食嘅球員歸隊搏殺，包括利華古遜前鋒孫興民、緬恩斯嘅具滋哲同埋朴柱昊，而史雲斯嘅奇誠庸更加質素超群，陣容比起巴西世界盃時更加勁，分組賽3戰全部以1:0取勝雖然係悶啲，不過就勝在夠穩陣，咪忘記佢哋踢到現階段都未失過一球，可想而知防守力幾咁堅固。如果以盤口嚟計，讓平手、半球最壞情況只係輸一半，用一半搏全部梗係抵玩啦，點解唔搏呢？
烏茲別克嘅球員好多都有俄羅斯血統，所以身型非常高大，亦有東歐球隊行軍快速嘅習慣，不過佢哋喺分組賽嘅演出唔算穩陣，對住全組最弱嘅北韓，都只能小勝而回，另外仲輸俾中國1:2，之前猛咁吹烏茲別克係今屆嘅奪標熱門，睇嚟係名大於實，今午難以阻擋太極虎南韓開出上盤。