馬體會讓客手到「拿」來

馬體會讓客手到「拿」來 
 
西班牙盃8強首回合演重量級大戰，4連勝嘅巴塞隆拿喺魯營出擊，並未足以降服遇強愈強嘅馬德里體育會，因為客軍出哂名擅踢盃賽兼硬淨，直接買讓球主客和嘅「讓客」，有2.58倍回報咪走雞。（周三26，now632台周四5:00pm直播）

巴塞隆拿近幾場比賽都贏得好輕鬆，包括西班牙盃16強兩回合總計炒艾爾切9:0，同埋上周西甲4:0大破拉科魯尼亞，早前喺聯賽亦試過擊敗馬體會3:1，但係雙方球員就踢到開片咁滯。華美倫、馬菲奧同埋沙維因傷缺陣。教練安歷基嘅排陣取向會係比賽勝負關鍵，因為巴塞隆拿今季一共擺出28套唔同嘅出場陣容，開季咁耐得一次係重覆正選陣容，但係西班牙盃輪換係佢嘅風格，就算見到美斯、尼馬同埋蘇亞雷斯等人擔正，後防都一直會稍作變動，其中達史特根取代哥迪奧巴禾把關嘅呼聲就最高，但係後者無疑比較穩健，巴塞後防將面臨重大考驗。

王子費托鹹魚翻生

馬體會上周西甲擊敗CF格蘭納達，而上一圈西班牙盃就淘汰咗同市宿敵皇家馬德里，士氣同埋信心都唔錯，最重要係費蘭度托利斯鹹魚翻生，上次對皇馬梅開二度洗盡霉氣，須知道王子一直係巴塞隆拿嘅剋星，過往10戰巴塞合共轟入7球，的確令人聞風喪膽。

巴塞最怕穩守突擊

此外，馬體會陣中另一位前鋒文迪蘇傑亦喺上場西甲取得「士哥」，幾位主力好似魯爾加西亞、基沙文、高甸同埋佐治高基亦有唔錯嘅狀態，作客魯營根本就唔使驚。更何況教練施蒙尼最叻打穩守突擊，一味以硬朗踢法同巴塞周旋，偷雞贏埋一啲都唔出奇，足智彩有讓球盤同讓球主客和提供，都係揀2.58倍嘅「讓客」吸引。