羅馬讓主「里」所當然

羅馬讓主「里」所當然
 
隨住上輪聯賽羅馬作客同巴勒莫踢成平手之後，要喺祖雲達斯手上攞走意甲冠軍已經越嚟越渺茫，不過為求有盃落袋就肯定唔會放過意大利盃！（周二15，now633台周三4:00am直播）
上場意甲同巴勒莫踢成1:1之後，落後祖記5分咁多，要後上奪冠真係談何容易，而主帥魯迪加西亞喺賽後就更加指明成班球員嘅心態好有問題，搞到吓吓作客都要送分，正正就係呢句說話亦講明佢哋近期作客麻麻，不過返到主場就仲係好有把握，撞正嚟到意大利盃16強就係喺主場出擊迎戰安玻里，睇好佢哋可以再晉一級。
冇錯羅馬剛剛先喺意甲出過，轉個頭又喺意大利盃亮相的確會面臨體力問題，好似老將托迪就應該唔會上陣嘞，不過首席射手拿積、中場大腦比真歷都係「90後」唔怕連場搏殺，另外休息近大半年嘅史杜特文亦好需要靠比賽谷吓狀態，憑住呢條中場線已經夠贏安玻里有突啦，唔好忘記對手亦喺幾日前對過國米，換言之雙方嘅休息時間相若，亦即係話想有盃落袋嘅羅馬根本就冇乜缺點，要埋「讓主」唔過份。