車仔讓客「物」超所值

車仔讓客「物」超所值

英格蘭聯賽盃4強首回合，利物浦喺主場大戰車路士，想先拔頭籌睇嚟有難度喎，因為車仔最近取得3連勝，加埋入咗10球而且冇失過波，攻守兼備下有力開「讓客」治紅軍。（周二8，無綫網絡電視301頻道周三3:45am直播〉

利物浦近8戰不敗，但係近幾仗贏波過程就未見輕鬆，包括足總盃僅以2:1淘汰低組別球隊AFC溫布頓，另外喺英超小勝新特蘭，演出馬馬虎虎，唯一慶幸只係對手太弱，今晚面對強敵車路士就會見真章。
巴洛迪利繼續冇料到，利物浦呢幾場比賽都要靠奇兵入波，包括拿沙馬高域、波連尼同埋列基林拔，前兩者嘅入球數字唔多，相信只係神來之筆，而宣布咗季尾離隊嘅謝拉特已經冇90分鐘氣力，好少會踢足全場，加上門將米洛列特始終令人欠缺信心，攻守都唔討好之下，要喺聯賽盃4強首回合贏波有難度。
車路士早前喺倫敦打吡不敵熱刺，但之後重新上路，先喺足總盃大勝屈福特3:0晉級，再喺英超以2:0擊敗紐卡素，同埋5:0大破史雲斯，3場比賽加埋入咗10球，而且一球波都冇失過，狀態相當勇猛，雖然領隊摩連奴好大機會派出部份副選，但係呢班後備兵絕對唔講得笑，例如以施治呢位捷克鋼門把關，後防都會穩健如昔，而兩位後備特手杜奧巴同埋雷米亦都效率驚人，幾乎每次有份落場都會取得士哥，所以買車仔使乜驚。

車仔聯賽作客殺紅軍

睇埋往績，車路士喺英超首循環作客晏菲路都照樣贏波，當時加利卡希爾同埋迪亞高哥斯達各建一功，協助車仔以2:1擊敗利物浦，是役再度造訪福地絕對可以反客為主，所以足智彩開讓球主客和，買藍戰士「讓客」包你可以獲「利」。