西布朗下盤惹人「愛」

西布朗下盤惹人「愛」  

愛華頓今季都唔知行咩衰運，場場打落唔知爭緊啲乜之餘，連運氣都離棄佢哋，上場喺足總盃重賽對韋斯咸踢到120分鐘輸12碼，球員消耗好大，連同周中一戰七場不勝，莫講馬天尼斯甚至連班球員都未必有信心，咁啱得咁橋今場對手竟然係新帥上任嘅西布朗，真係非常唔啱時機，睇嚟有機會又再一場失分。（周一7，now621台周二4:00am直播）

如果一定要喺今愛華頓身上，搵一個打得唔好嘅原因，咁後防應該係最大主因，首先積基爾卡本身未算一線防守球員，今季久唔久都見佢有大意犯錯，而迪斯甸年屆38，亦冇可能長期維持高水平，而今季重點培訓嘅約翰史東斯，能力夠但經驗肯定不足，愛華頓長期後防不穩，今季失34球比李斯特城更多，近7場波佢哋不勝，亦係全數出現失球，馬天尼斯再唔入貨下半季肯定冇得救。

西布朗反彈兩連勝

但問題係，愛華頓本身號召力有限，人未買到，隨時先走兩三個，首先伊度奧已鐵定加盟森多利亞，而曼聯亦已報價後防史密斯高文，至於路斯巴克利則係曼城同利物浦目標，反而未聽過馬天尼斯有咩買人大計，可能球會都要先賣後買至有資金，咁球會都好難短期重整實力。
話愛華頓黑仔，因為佢哋揀中一個最差時間出戰西布朗，西布朗季中戰績一度下滑，所以連領隊都換埋，但竟然俾佢哋搵到普利斯出山，真係同執到錢冇分別，睇普利斯過去帶史篤城同水晶宮幾咁有聲有色，又係上季最佳教頭，西布朗果然即時反彈連贏兩場，今戰球隊前中後三線都幾齊人，甚至一個比拉希奴都已經令愛華頓會好麻煩，唔通愛華頓真係要8場不勝？