史雲斯讓主「士」日重心

史雲斯讓主「士」日重心 

英超周六晚大戰有史雲斯對車仔，史雲斯啱啱賣走咗韋菲特邦尼賺咗一筆，計劃上係想買番啲新貨，不過幾名傳緊加盟嘅仲未傾掂之餘，今戰又有中場大腦舒維爾停賽，車仔技勝一籌睇牌面似可以作客贏波，不過留意車仔有聯賽盃4強大戰後顧，呢場人腳上唔保留心態上都有所保留，信主隊保住不敗開「讓主」。（周六10，now621台周六11:00pm直播）

呢場波其實本來就冇咩特別，反而車仔主帥摩連奴啲串爆言論仲好睇，記得早前佢大鬧球證執法不公，話球證冇判12碼俾佢哋，反而罰法比加斯黃牌，到上星期賽前賽後，佢又缺席球隊記者會，結果又再次被警告，雖然喺今場波之前佢終於現身，但仍然冇收返早前，批評足總針對車路士嘅言論，呢場波玩吓手球證都怕咗佢。

車仔作客六度失分

車路士今場隱憂，有啲球迷又可能當係喜訊，就係古爾圖斯仲未出得，呢場仍然仍施治把關，施治一連兩場正選都冇失波，呢個「超級後備」真係令人太放心，不過車仔今場最令人擔心唔係喺啲人腳度，反而係唔知摩連奴會唔會玩嘢，睇番車仔今季兩場敗仗，其實都係球隊刻意放慢速率致敗，要知道佢哋4日後聯賽盃大戰利物浦，呢場就算有齊法比及迪亞高哥斯達等落場，都可能會放軟手腳，而事實上車仔今季作客成績麻麻，踢11場有6場失分，過去4次作客史雲斯只贏過一場1:0咁大把，呢場真係惡唔出。

白天鵝前線有板斧

當然史雲斯冇咗邦尼，又有舒維爾停賽，實力點都打啲折扣，但係球隊士氣夠好，又傳會買番卡路士巴卡等前鋒補數，前線巴菲迪高美斯都係法國國腳，仍然有足夠板斧入波，呢場迫和車仔一啲都唔出奇。