摩納哥「多」數開上盤

摩納哥「多」數開上盤
 
今晚法甲主菜係摩納哥主場迎戰波爾多。摩軍季初冇晒法卡奧同占士洛迪古斯，但成績竟然唔算嚴重下滑，歐聯殺到入16強，近期聯賽戰績亦有改善，聯賽4連勝包括主場殺敗馬賽下，已殺到上第5位，就算有前鋒拉仙拿查奧爾同後衛艾登路亞因征戰非國盃缺陣，讓半一依然值博。（周日27，無綫網絡電視302頻道周一4:00am直播）

老牌球隊波爾多今季持續近季不穩定表現，踏入12月踢5場正式比賽得1勝，仲先後作客1:2不敵南特同主場0:5大敗俾里昂，就算歇冬後主場贏咗圖盧茲晉級，依然未夠證明近況已有改善；再講，波爾多有射手卡斯里、沙維特、中場安祖樸高、阿布度查奧爾同後衛魯杜域辛尼因出戰非國盃缺陣，受影響比主隊更多，造訪摩納哥都係九死一生居多。
另一直播戰係南特主場對梅斯。南特近期表現又好番，近4戰3勝1和入咗10球，相反梅斯只係法足盃作客贏埃皮納勒，之前已經7場不勝，近況、級數輸晒難逃一敗。（周日16，無綫網絡電視302頻道周一12:00am直播）