馬體會下盤手到「拿」來

馬體會下盤手到「拿」來

又係美斯！你唔悶我都悶啦！之但係美斯被傳會轉會反而激發出佢嘅鬥志，周中贏艾爾切5:0場波，佢一個人交兩個助攻一個入球，不過今晚呢場都認真惡搞，因為對手正係上屆冠軍馬體會，施蒙尼上場用費托完全係為今場大戰巴塞留力，既然馬體會留晒力又多一日休息，呢場受讓點可以唔買先？（周日26，now632台周一4:00am直播）

巴塞內部已經亂到冇得再亂，先有教練安歷基同美斯傳不和，聽聞安歷基想處罰美斯，竟然引嚟三個隊長，包括沙維、恩尼斯達同巴斯基斯同時反對；繼而再有內部權力鬥爭，蘇比沙列特、佩奧爾先後下馬，再有主席巴迪莫被迫提早大選，所以美斯喺內亂期間被賣走並唔係冇可能。不過巴塞始終有好強底蘊，就算球隊點亂陣容仍然星光熠熠，周中即時大炒艾爾切擺到明係要振奮士氣，呢次同馬體會打都有好戲睇嘅。

馬體會前場緊迫有計

只係如果計晒所有條件，呢場馬體會絕對不下巴塞；首先排陣上，上場施蒙尼收起文迪蘇傑、高基同艾達杜蘭，擺明留晒力對巴塞，而打法上巴塞就最怕施蒙尼呢種前場壓迫，今季已見到無論碧基定馬菲奧都好，都經常出現犯錯；而且安歷基今季一打強隊，就會用馬菲奧打左閘，中路拉馬斯查蘭奴落嚟，咁樣既削弱自己中場，左路又中門大開，今場咁打法只會益咗基沙文等快馬。

巴塞防守死球能力弱

此外，馬體會另一瓣殺着就係死球戰術，以巴塞守死球嘅能力，今場馬體會一有角球又變相叫胡，上季馬體會嚟到魯營都和到波，依家兩隊狀態似乎高下立見，馬體會贏埋都唔出奇，而呢場波離奇在，足智彩竟然少有地開出讓球讓1球嘅盤口，買馬體會嘅話，就算輸1球都只係走盤，和波就成個盤鯨吞，咁着數點可以唔買呀！