利物浦上盤唔「蘭」開

利物浦上盤唔「蘭」開

若要生活好，咪買利物浦！費格然過往聽過呢句名言唔知幾多次，但當見到謝拉特近期缺陣時候，紅軍行軍都特別快特別醒，今晚作客新特蘭初盤仲開到讓半一咁辣，又真係感覺可以信多佢哋一次要上盤。（周六5，now621台周六8:45pm直播）

利物浦喺早前英足盃作客險勝AFC溫布頓，謝拉特更包辦兩個入球，但由於佢已宣布會喺季後離隊，領隊羅渣士亦表明唔會再場場擺神奇隊長喺正選，有理由相信紅軍今晚會派出一個年輕當打有活力陣容出擊；睇番佢哋之前大勝史雲斯4:1比賽，球隊喺冇謝拉特下即重現上季蘇亞雷斯同史杜歷治在陣時嘅速率同組織能力，今次以差唔多陣容應戰，只係少咗一個中場傷兵拉爾拉拿，若發揮正常絕對有力再大勝一場。
新特蘭賽前排第14，仍要為護級而努力，但球隊自從喺打吡戰贏紐卡素後，接連3場聯賽得1和2負，當中主場大敗俾侯城同作客悶和維拉都唔係乜嘢好賽績；此外，黑貓賽前證實有卡達莫、魯迪維爾、雷維利尼同列卡度艾華利斯等一系列傷兵，三線都唔夠人用下，受讓依然信唔過。