曼城客勝實而不「華」

曼城客勝實而不「華」
 
曼城喺聯賽唔經唔覺已經追到同車路士同分，今晚作客愛華頓相信都唔想失分兼再度被車仔放甩，喺3分一定要到手情況下，1.75倍客勝可放心捧場。（周六9，now621台周六11:00pm直播）

曼城近排氣勢如虹，除咗對般尼領先兩球被迫和失威之外，其餘比賽全數贏晒，聯賽追至同車路士同分兼只輸得失球，衛冕英超冠軍依然有計。事實上，曼城目前雖有高柏尼、拿斯達錫、迪斯高同阿古路等傷兵，但場上表現卻似乎未有影響，幾名中場占士米拿、大衛施華以及林柏特都輪流攞到「士哥」，唯一擔心係耶耶托尼因替科特迪瓦征戰非洲國家盃而缺陣，所以計落都係唔敢捧盤，直接要1.75倍客W比較穩陣。
愛華頓今季俾人雷聲大雨點小感覺，季初正式買入盧卡古、巴利等上季借將，但成績不升反跌，聯賽排到13位僅高過新特蘭。近況方面，愛華頓近10戰只贏過昆士柏流浪，加埋仲輸咗7場，領隊馬天尼斯形勢絕對水深火熱，加埋球隊今周仲有侯活、迪斯甸、希拔、奧士文、派拿同埋吉遜等傷兵唔打得，要抗衡藍月亮來襲真心唔易。