車仔主其他橫「素」對手

車仔主其他橫「素」對手

成個星期都美斯美斯！啲車路士球迷已經唔記得自己上一場聯賽慘敗俾熱刺嘅事實，不過嚟到1月時間，車仔都有啖氣唞吓，喺贏咗屈福特之後已經休息咗5日，今晚呢場聯賽應該可以回到最佳狀態出戰紐卡素，紐卡素「賣」咗領隊柏祖後又未有新人上任，今場傷兵多之餘，又有兩大主力出走非國盃，車仔今場勢化身「坦克車」「素」除對手。（周六8，now622台周六11:00pm直播）

成個星期關於車路士嘅新聞都同美斯有關，有部分歐洲傳媒，甚至連馬卡報都話，美斯的確有可能以天價上車，據報車仔已同意付出美斯違約金嘅2億歐羅，而另一方面巴塞內部亦出現新一輪權力鬥爭，安歷基同美斯不和又浮上面，呢單看似不可能嘅交易，就係隨時1月就成事都未定。

法比否認幫手撬美斯

有傳媒就口痕認為，美斯之所以揀車仔，某程度都同法比加斯有關，係人都知兩人以往喺拉馬西亞訓練時已關係密切，不過法比仔已即時澄清，話自己只係足球員，絕對唔會做呢啲雞仔媒人，不過佢又同時講到，自己認識嘅美斯絕對唔會講類似嘅說話，認為所有嘢都係謠言居多。
雖然車仔傾唔傾得成美斯都係大件事，但車迷有冇美斯都冇咩所謂，以車路士現時陣容，根本多一個唔多少一個唔少，今晚主場出戰紐卡素，成隊車路士冇任何傷停，杜奧巴同米基爾都唔使返非洲，真係搵唔到一個失分可能。

喜鵲兩主力戰非國盃

相比起車仔，紐卡素就連一個似樣啲嘅陣都排唔到出嚟，其中哥爾碧克、真馬特、穆沙施素高全部有傷，出場機會五十五十，另外柏比斯施斯同迪奧迪都辰出戰非國盃，呢場紐卡素半隊正選都唔知排唔排到。
大家唔好唔記得，今季打破車仔不敗身嘅，正正就係紐卡素，今次主客對調本來車仔已經好有利，何況車仔今場唞夠「夫添」出擊，結合復仇心態，呢場點會放過呢隻「喜鵲」，「-2」都費事買，捧「主其他」啦！