西維爾客勝冇「蘭」度

西維爾客勝冇「蘭」度
 
數嚟數去有能力爭西甲冠軍嘅球隊不外乎皇馬、巴塞，最多加埋隊馬體會，好似西維爾呢類中型班要有錦標落袋就一定唔可以放過盃賽，今晚喺西班牙盃16強首回合作客弱旅CF格蘭納達仲唔去馬，仲等幾時？（周四1，香港時間周二3:00am開賽）

主隊料留力護級

能夠抽正對住CF格蘭納達已經係一支上上籤啦，始終主隊目前喺西甲只係排到第19位，加上佢哋上場聯賽勝仗足足要數到去四個月前咁耐，話冇降班危機就一定係呃你啦。而佢哋班底咁薄隨時顧到聯賽顧唔到盃賽，相信佢哋都知道係時候行人止步，今晚話唔定盡派副選落場就算！不過即使CF格蘭納達真係咁蠢派出強陣都好，今季佢哋嘅首席射手艾亞比嘅入波用一隻手都數得晒，真係唔知憑乜同西維爾硬撼。
相反西維爾近年明顯轉攻盃賽就算，上季假假哋都殺入過歐霸決賽，而今季喺唔少主力離隊之後喺歐霸繼續有表現，幾位主力好似卡路士巴卡、麥比亞，以及班尼加等人一早就知道盃賽應該點踢；特別係要留意以上主力由12月開始連場搏殺都未有走樣，喺呢段時間仲先後贏到華歷簡奴、列積卡同埋切爾達，趁住仲未腳軟應該可以繼早前贏完對手之後再下一城。