羅馬讓客妙到毫「甸」

羅馬讓客妙到毫「甸」 
 
羅馬爭標仲未絕望，為咗追逐意甲冠軍夢，呢支首都球隊作客烏甸尼斯一定唔會留手，適逢主隊近幾個月嘅走勢令人失望，好難做到攔路虎，信羅馬可以開出「讓客」酬謝粉絲。（周二2，無綫網絡電視301頻道周二7:30pm直播）
烏甸尼斯近9場比賽贏得1場咁大把，最近1次主場出擊亦不敵維羅納，走勢真係麻麻，雖然巴西中場亞倫盧利奧坐完波監可以復出，不過路爾斯梅利爾、艾雲皮里斯同埋古靴美托里斯就繼續倦勤，始終都唔能夠排出最佳陣容出戰。
羅馬嘅傷兵就包括第三門將史高盧比斯基、沙利烏簡同埋長抖嘅巴沙列堤，影響相對較細，而且艾斯托利、賀利巴斯同埋比真歷都會喺今戰復出，中後場實力大大增強，加上托迪、謝雲奴同埋迪斯度等攻擊主力冇傷冇病，羅馬嘅人腳無疑優勝，鑑於呢支首都球隊目前僅落後榜首祖雲達斯3分，爭標絕對未投降，作客烏甸尼斯呢類中游份子梗係會搏老命啦，更何況羅馬近兩屆作客嚟到獲1勝1和不敗佳績，今仗可謂勇者無懼，捧羅馬「讓客」係相當正路嘅選擇。