祖記讓主「米」已成炊

祖記讓主「米」已成炊 
 
意甲深夜尾場上演褪色大戰，榜首祖雲達斯喺主場出擊，面對日落西山嘅國際米蘭可謂有贏冇輸，雖然藍黑兵團換帥冇耐，不過始終唔見起色，捧祖記「讓主」梗係得「米」啦！（周二15，無綫網絡電視301頻道周三4:00am直播）

祖雲達斯雖然喺意超盃嘅12碼大戰中不敵拿玻里，但係佢哋喺90分鐘嘅正式比賽當中，仍然保持緊11場不敗，期間更一度打出個6連勝，難怪可以穩站意甲一哥位置。
馬田卡沙利斯同埋盧卡馬朗尼已經傷癒復操，有機會出現喺大軍名單，而邦路斯就停賽完畢準備復出，換言之球隊只係得番卡華禾艾沙姆同埋後備門將史度拉利兩人肯定缺陣，好在鋼門保方已經好番，所以斑馬兵團亦冇後顧之憂，而前鋒泰維斯雖然堅決唔續約，不過佢只係思鄉病發想番祖國阿根廷落班，並唔係同球會有拗撬，故此唔會影響隊內士氣，正常發揮下，祖記3分穩袋。
國際米蘭改由文仙尼執教之後，表現並冇太大起色，當中6場正式賽事只係取得2勝2和2負，早前同巴黎聖日耳門友賽亦輸波，畢竟藍黑兵團積弱已久，絕對唔係一時三刻可以反彈，唯有等球季完結大執再睇睇有冇得救。

普多斯基與隊友欠默契

德國國腳普多斯基已經由阿仙奴來投，暫時未知佢會唔會落場，不過即使勉強披甲，同隊友之間亦肯定欠缺默契，加上巴西中場靴蘭尼斯同埋莊拿芬施些路有傷唔踢得，教練文仙尼想排強陣都冇可能，是役作客迪爾艾比球場等劏，讓球主客和撐祖記開「讓主」穩陣。