AFC溫布頓「利」開半和

AFC溫布頓「利」開半和 

英格蘭足總盃一向係爆冷溫床，而今晚就有場越級大戰上演，當中喺英乙排名第11位嘅AFC溫布頓，將會迎接排名比佢哋高72位嘅利物浦，AFC溫布頓隊長阿倫賓納特表明，全隊會以最大決心做出一個震驚全世界嘅賽果，而紅軍殘陣下今場要讓到「-2」又似乎唔太值博，就算唔信AFC溫布頓爆到冷，呢場冷吼主隊守得穩半場似乎又博得過。（周一6，now621、633及660台周二3:55am直播）

AFC溫布頓喺2002年成立，今次係創會13年以來第一次打入足總盃第3圈賽事，而呢隊波當年之所以創會，係因為前身嘅溫布頓破產，轉手後搬到米爾頓凱恩斯，一班原有嘅溫布頓球迷自發組成呢隊波，近年一直由最低級別打上嚟，難怪佢哋領隊尼爾阿迪利都話今次殺入足總盃第3圈係球會嘅里程碑。

溫布頓細場浸蛟龍

今次主場作賽嘅AFC溫布頓，佢哋主場只有4,720個座位，隊長阿倫賓納特都話，佢哋每一個球員都只分得2張門票，而當中利物浦球迷就有1,000張，佢剩係煩請邊個嚟睇都頭痛，不過既然主場細細，紅軍班大帝肯定踢唔慣，呢場波隨時嚟個淺水困蛟龍都唔定。
利物浦經過一個英超快車，得出來嘅結論原來冇謝拉特一場打得最精彩，之但係「神奇隊長」喺被李斯特城迫和之後又宣布季尾離隊，紅軍球迷都真係難離難捨；不過從勝負角度上睇，利迷都希望謝拉特每場打15分鐘可以啦，而今場謝老四就直頭停賽，球迷就更放心，而除咗隊長唔打得之外，巴神都仍然未出得，不過防線上有史基迪爾坐完波監復出，加上傷癒嘅洛夫雲，似乎今場紅軍防守力比起起攻能力更值得信賴。

紅軍輪換半場難贏

除咗幾名傷兵唔出得之外，今場班頓羅渣士應該都會輪換得幾緊要，當中場場打足嘅史達寧應該會休息，俾啲馬高域多啲上陣時間，前線列基林拔今季坐多過踢，呢場點都輪到佢正選，呢個陣容可能都要攻一後時間至入到波，博個半和非無的放矢。