維拉利爾方興未「艾」

維拉利爾方興未「艾」
 
歇冬前近況大勇嘅維拉利爾，會喺今晚重新出發造訪艾爾切。以「黃色潛艇」級數及近況計，今晚贏面肯定壓一，但初盤冇讓球買，作客又唔敢買「讓客」，不如穩穩陣陣買1.6倍客勝算數。（周六30，香港時間周日3:00am開賽）
維拉利爾近期表現可用無懈可擊形容，球隊歇冬前7戰全勝，當中僅喺對卡迪斯西班牙盃比賽有失球，近戰更先後輕取皇蘇、拉科以及作客擊敗馬體會，賽績絕對可靠；陣容方面，維拉利爾雖有湯馬士賓拿要坐波監，但莊拿芬杜斯山度士、韋圖以及卓利舒夫等近期有表現球員都可以候命，故除非突然失準，否則攞3分走機會好高。
主隊艾爾切聯賽排第20，即包尾位置，明顯以級數計喺西甲唔多夠班；事實上，艾爾切歇冬前踢咗16場聯賽僅2勝，但輸咗10場加埋失32球，係全西甲失波最多球隊，今面接近「夫添」出擊嘅黃色潛艇，球隊更有射手伊度艾巴卡要坐波監，真係點睇都唔似會偷雞成功；至於費格然唯一擔心，係今場始終係歇冬後首場比賽，客軍狀態未必可完全谷起，唔捧盤單捧客W就最正路。