西維爾讓主一刀「切」

西維爾讓主一刀「切」
 
馬體會比賽之後，西維爾會緊接出場對切爾達。主隊今季演出頗為穩定，而切爾達近績非常普通，各項數據都顯示西維爾有力贏波贏盤。（周六26，now632台及無綫網絡電視13頻道周日1:00am直播）
雖則歇冬前僅和升班馬伊巴，但西維爾喺之前累積4連勝，就算對手唔算強只係格蘭納達同華歷簡奴之流，但已足夠證明球隊演出穩定；事實西維爾主場賽績亦唔錯，近10戰8勝入咗24球，今晚主力如卡路士巴卡、班尼加、丹尼斯蘇亞雷斯以及麥比亞等皆可候命，僅兩名長期傷兵基斯度科路同泰莫連拿斯未能應戰，有理由相信只要球隊發揮出水準，3分理應手到拿來。
切爾達歇冬前排第8位，雖則表面上唔係落後西維爾好多，但球隊積分其實全部係季初搶落，佢哋歇冬前8戰僅得1勝1和6負，僅喺西班牙盃主場贏低組別球隊拉斯彭馬斯，近況如何讀者心中有數。此外，切爾達今場更迎來致命打擊，兩名主力奧古士圖費南迪斯以及洛尼圖，都因累積夠黃牌數目而要停賽，後者係切爾達2號殺手，其缺陣肯定對球隊損害好大，增加落敗機會。