馬體會讓主圖「利」

馬體會讓主圖「利」

西甲喺今晚正式重開！經過短暫歇冬期，西甲會喺今日再度上演，其中馬體會將喺頭場迎戰利雲特。主隊歇冬前及時回勇作客大炒畢爾包，故就算剛回歸嘅費托未必可候命，計落仍讓得起利雲特2球，「讓主」值捧。（周六20，now632台周六11:00pm直播）

馬體會喺歇冬前一度陷於低潮，試過連續3場不勝，好在球隊喺休戰前最後一輪西甲比賽及時回勇，作客4:1大破畢爾包，預期呢場勝仗對球員士氣會有好大幫助。此外，馬體會今晚將可以強陣出擊，上輪要坐波監嘅佐治高基同文迪蘇傑，今晚都可以等候教頭施蒙尼調動，再加上剛戰大演帽子戲法嘅基沙文，主隊攻力唔使懷疑。

利雲特作客往績差

主隊今晚另一焦點，自然係落喺日前正式宣告以借用身份回歸嘅費托身上；但賽前消息指呢位前馬體會球迷寵兒，或會等到下周西班牙盃對皇馬時先首度登場，不過唔緊要啦，據講費托喺球隊頭幾課操練演出都係一般，5次攻門訓練只入到1球，今晚唔落場住其實對球隊影響唔會好大。
客軍利雲特歇冬前排第15位，話冇護級壓力就假，只係球隊限米煮限飯下，成績自然難有改善，歇冬前係就係5場不敗，但全數和波而對手只係基達菲、科爾多瓦同皇家蘇斯達之流，級數同馬體會根本冇得比。再者，利雲特今晚仲要有主力大衛拿華路要坐波監，赫達洛達斯則因傷倦勤，加上佢哋有近6次造訪馬體會全敗紀錄，近5次更全部失最少兩球，喺級數、數據全部輸晒下，讓球主客和受讓兩球都冇着數可言。