車路士上盤天「刺」良機

車路士上盤天「刺」良機
 
英超元旦日上演倫敦打吡，熱刺又遇剋星車路士，睇嚟3分都凍過水，事關熱刺今屆同強隊交手表現一般，對車仔嘅往績更慘不忍睹，所以足智彩開讓球盤，藍戰士作客讓半球、一球捧上盤。（周四16，now621台周五1:30am直播）

喺聖誕新年快車檔期，熱刺唯一嘅優勢就係連續兩場留喺白鹿徑作賽，免卻咗舟車勞頓之苦，問題係佢哋上場對曼聯時表現一般，如果唔係門將洛里斯有超水準發揮，熱刺應該一早輸咗。法斯奧同埋維頓漢呢對中堅絕對唔穩陣，新星哈利卡尼連續4場入波嘅走勢亦斷咗攬，領隊普捷天奴預計會稍作輪換，以基爾獲加取代基利捷斯踢右閘，拉美拿亦有機會代替安祖斯唐辛打正選，史譚保利就會讓位俾賓達納。

哥斯達已破入球荒

車路士上場英超亦失分，只能夠作客迫和修咸頓1:1，好在元旦日嘅對手只係北倫敦球會熱刺，路程並唔算太遠。迪亞高哥斯達已經打破咗早前嘅入球荒，夏薩特就持續有好表現，領隊摩連奴將會俾奧斯卡杜斯山度士同埋艾斯派古達重返正選行列，藍軍嘅攻守實力勢必增強。值得一提嘅係，車路士過往3次成為冬季年終冠軍，最後都可以捧走英超，絕對係一個好兆頭，而且喺當地傳媒選出嘅半季最佳陣容當中，車仔亦都有6個球員入選，包括尼曼查馬迪同埋隊長泰利，可見全隊嘅發揮相當穩定。

首循環車仔大勝三球

翻查往績，熱刺對車路士真係冇啖好食，12月初作客史丹福橋就試過慘敗0:3，即使係計白鹿徑交手嘅成績，熱刺近4次主場亦未贏過車路士，格食格味道好濃，所以足智彩開出讓球盤，藍戰士作客讓半球、一球唔過份，捧上盤食「刺」。