聖日耳門主勝得「米」

聖日耳門主勝得「米」
 
除咗皇馬之外，今晚嘅友賽戲碼仲有隊聖日耳門列陣，而佢哋今晚將會喺非洲國家摩洛哥同國米踢友賽，國米現時實力一般，文仙尼只懂為失敗找藉口，反之聖日耳門有帶伊巴謙莫域出遊，呢場主隊似乎較信得過。（周二4，無綫網絡電視301頻道周三3:00am直播）

國際米蘭早前換帥，由以往曾帶領球隊捧走意甲冠軍嘅文仙尼重掌帥印，但球隊近8戰都係僅贏2場，一來證明文仙尼重返意甲繼續冇料到，二來證明國米現時陣容又真係好難同列強周旋，所以文仙尼都講明一月肯定要增兵，不過2015年未到前，文仙尼都要解決咗前幾場比賽嘅先問題先。
今場國際米蘭都有幾多主力唔打得，當中有返咗國家隊嘅長友佑都，中場主力靴蘭尼斯同加埋左閘杜杜有傷，呢場波國米都幾殘陣，當然球隊前線有嚟緊將為人父嘅阿根廷前鋒莫路伊卡迪等，輸波都未必會捧蛋而回。
至於法甲富豪球會巴黎聖日耳門，就經歷咗一個令人失望嘅上半季，除咗喺聯賽只列第三外，佢哋又喺歐聯分組賽最後一戰不敵巴塞隆拿，結果要喺16強面對英超勁旅車路士都真係極黑仔。而事實上，巴黎聖日耳門近4戰只係贏過1場，睇番佢哋兩場聯賽更只係入得一球，無疑陣中嘅瑞典前鋒伊巴謙莫域狀態好與否，對球隊嘅攻力影響好大。
而伊巴謙莫域今次係有隨隊遠征，預期主帥白蘭斯都想伊巴謙莫域快啲打起狀態唔會有保留，加上其他主力悉數在陣下，呢場巴黎聖日耳門要贏波應該冇大問題，睇主隊現時嘅主勝賠率有1.65倍，用嚟過關已經係一個唔錯嘅賠率。